竹野內豐三笑施冧功
曾一度冧死港女的日本男星竹野內豐，昨日首度訪港為時裝店擔任剪綵嘉賓，吸引逾百粉絲一睹型男風采。基於保安關係，竹野內只逗留十五分鐘兼回答兩條問題，幸他十分識做頻施冧功，幾度微笑氹粉絲。
日本型男竹野內豐昨日首度來港，展開兩日一夜旋風式訪港之旅，雖然他全程惜「言」如金，但狂冧粉絲大派迷人笑容。
態度親切揮手
今年是時裝品牌D'URBAN四十周年，竹野內自2月1日起成為品牌中、港、台、日、韓等地最新代言人，昨日他應該品牌之邀來港為全新概念店擔任剪綵嘉賓。昨午二時半，竹野內身穿恤衫及牛仔褲，一身casual打扮抵港，身邊有八名工作人員護駕，雖然零粉絲接機，他仍笑容可掬、態度親切，上車時不忘向傳媒揮手，之後座駕直駛向下榻的四季酒店。
晚上七時，竹野內換上白恤衫、黑西裝抵達海港城新店，門外一早站滿過百粉絲及逾半百傳媒，場面墟冚，粉絲甫見偶像現身便大聲尖叫，又大叫其日本名字，竹野內亦識做地向粉絲展示殺死人笑容，剪綵時，他又頻頻面向粉絲微笑及向記者揮手，大顯親民作風。
十五分鐘即閃
大會事前已聲明竹野內不會接受訪問，只會回答大會預早安排的兩條問題，司儀問及對香港的感覺時他說：「今次首次來港，一出機場見到好多記者，嚇咗我一跳，但好期待亦好榮幸，覺得十分開心。（想去邊度參觀？）我想有時間可以喺香港周圍睇下，但好可惜日本工作好忙，根本冇時間逗留，希望下次嚟耐啲，可以周圍行下。」之後他即返回店內參觀，接着離開，整個過程約十五分鐘。
文：名人組