陳蕊蕊唔避忌約錢國偉開餐
美味天使陳蕊蕊及賈曉晨（JJ）等昨日出席無綫節目記者會，此節目原先由涉嫌貪污的錢國偉任監製，雖然現時換了監製，但一眾美味天使依然有得留低，陳蕊蕊坦言會相約錢國偉食飯，而JJ指若對方開公司亦會幫手。
王祖藍、鄭裕玲、陳蕊蕊及JJ等昨日出席《飲食天王頒獎典禮2010》記者會，之前有指涉嫌貪污的監製錢國偉（Wilson）一手發掘的美味天使會「冇得留低」，而此節目原屬錢國偉監製，現時改由監製衛世輝接手，但昨日陳蕊蕊、劉俐等人都性感出席，依然有得撈。
換監製唔失望
陳蕊蕊說︰「都唔關事，冇乜影響，我同無綫合約仲有差唔多一年，（有冇聯絡Wilson？）有傳短訊，可能遲啲都會約出嚟食飯。」而同樣憑Wilson的節目《美女廚房》而走紅的JJ被問到現時換了監製會否感失望？她說︰「都冇，做任何節目都有唔同監製，Wilson係我恩人，事發後都有同佢傳短訊，佢有覆我，希望佢嚟緊有好發展！」
JJ盡能力幫手
問JJ若錢國偉開公司會否幫忙，她說︰「有能力都會幫手。」至於監製衛世輝坦言節目中的班底及形式都會沿用之前所定的。
而王祖藍被指最近「升呢」，往往與「姐級」人馬合作，更被《獎門人》的獎老錢嘉樂笑指是「反骨仔」，他謂︰「冇辦法，希望嚟緊我哋有crossover，福祿壽一齊上《獎門人》玩。」
文︰影視組