盈盈騎嘉樂即生慈姑椗
獎門人曾志偉、獎老錢嘉樂等為遊戲節目錄影，嘉賓湯盈盈繼續成被玩對象，在其中一個遊戲環節，盈盈要跳上嘉樂大腿壓爆氣球，有「塘邊鶴」問：「生咗未呀？」嘉樂即說：「生咗啦！慈姑椗嚟！」
曾志偉、錢嘉樂及新加入的獎老金剛、江欣燕、Otto前晚為《超級遊戲獎門人大爆發》特別版錄影，嘉賓包括有湯盈盈、洪天明、吳家樂、梁靖琪（Toby）、HotCha及森美等，而盈盈及嘉樂繼續成為被玩對象。錄影前，盈盈被問到嘉樂笑指找她與前女友李珊珊、李麗珍搞一個特別版時，她謂：「係咩？乜咁多架？」在旁的天明聞言即謂：「好玩喎！今日獎品係錢嘉樂！」盈盈即謂：「我要贏呀！」天明笑說：「暫時都係你贏緊。」盈盈即說thanks！之後見到電視機有嘉樂，她又即風騷撲埋去影相。
胸對胸飛彈
而錄影期間，志偉要求盈盈說出喜歡錢嘉樂的理由，她即說：「高大威猛、英俊瀟灑。」嘉樂聞言卻尷尬地說：「我都有啲想反胃。」
玩遊戲時，眾人分兩組用口傳食百力滋及烏冬，最後以最短為勝出。期間，狼死的Toby不怕與天明嘴對嘴，而吳家樂與盈盈掂嘴時，森美在旁大嗌：「錢嘉樂望住你哋呀！」
於《超級遊戲爆波波》中，男方從後抬起女方的腳，女方則以胸口壓爆氣球，身材豐滿的Toby被嘉樂取笑是「胸對胸飛彈」。此環節升級版中，女方要跳上男方大腿上壓爆氣球，當盈盈跳上嘉樂大腿時，旁邊即有人問：「生咗未呀！」嘉樂說：「生咗啦！慈姑椗嚟！」天明被狼死的Toby一跳上大髀，即面露痛楚之色，HotCha的Winkie跳上Eddie大髀時，更坐爛櫈，狀甚搞笑。
HotCha顯獸性
事後問天明下體有沒有大礙時，他說：「冇事，仲好有彈力，Toby跳上嚟已經唔痛，麻痹咗，佢哋好似殺人咁，以為盈盈啲中女犀利啫，HotCha佢哋都係傻架！可以睇到佢哋啲獸性。」嘉樂聽到記者指盈盈有獸性時笑謂：「所以我今日好驚囉！（盈盈用胸壓波會否心痛？）有咩？（返去同佢body check！）body check？可惜我唔係醫生，（佢平時同你喺屋企玩係咪都咁有獸性？）冇同佢喺屋企，一見到佢嚟都眼冤，好似殭屍見到糯米咁！」
文：影視組