Sa爸做和事老嘆有心無力
蔡卓妍（阿Sa）與鄭中基離婚，有傳Sa爸（蔡就勝）曾做和事老，昨日致電Sa爸，對於Sa基宣布離婚，他嘆氣一聲說：「唉，作為爸爸梗係希望個女開心，我都唔知點講好。（有無做阿Sa和Ronald和事老？）我都想，但心有餘力不足！（滿意Ronald呢個女婿嗎？）ＯＫ啦，滿意滿意！」他強調與「親家」金牌大風老闆鄭東漢和Ronald情不變：「公私分開講，我同鄭爸爸工作上合作關係不變。」
聽到阿Sa連續兩日含淚開工，Sa爸停頓數秒後，說：「近年我為咗做嘢成日周圍飛，唔喺香港，阿Sa由媽媽照顧，依家佢都係跟媽媽住。唔知佢依家做完嘢未呢？陣間打個電話畀佢。（勸Sa基唔好離婚？）我都想呀，有啲嘢，我……」06年他有否赴美國見證婚禮？Sa爸欲言又止：「有啲嘢我唔方便講。（阿Sa婚後才通知你？）等我返嚟香港再講啦！」
