湯怡恨做打女貪有型
影壇新人湯怡外表斯文柔弱，但原來私底下的她粗魯又倀雞，湯怡更自爆小時候為一張心愛的偶像照片而跟弟弟打交，最終令弟弟頭破血流而「破相」，令她內疚至今。
湯怡最近準備接拍新電影，外表斯文的她，坦言最希望演繹「飛女」或打女角色，展示其外柔內剛的一面，湯怡說：「我覺得呢啲角色好有型，好似阿嬌（鍾欣桐）演打女演得好成功，希望自己都可以好似佢咁！」問湯怡演打女不怕被別人覺得自己粗魯？她笑笑口說：「我真係好粗魯架，親戚朋友個個都當我男仔，冇人當我係女仔架！」
面上留痕感內疚
湯怡自爆十多歲時，深深迷上謝霆鋒，家中亦收藏不少偶像的相片，有日年幼的弟弟將其中一張她心愛的照片畫花了，湯怡怒極狂打弟弟，她說：「我打細佬時佢又還手，兩個人喺屋內打嚟打去，我唔小心推佢撞落枱角，搞到佢眼角狂標血，阿媽見到就送咗佢去醫院縫針！」事後湯怡當然避不過「藤條炆豬肉」，亦令她感到內疚，她說：「最內疚係搞到細佬眼角留有疤痕，每次見到佢呢條疤痕我就好後悔！」
唔介意拍洪卓立
然而湯怡始終保持少女心境，她期望演一套愛情片，她說：「愛情片唔一定係談情說愛，可以係好悲情好感人！」問湯怡會否介意和緋聞男友洪卓立飾演情侶？她說：「唔介意，同事嘛，佢又靚仔我又靚女，但我對住佢驚忍唔到笑喎！（拍親熱戲會否怕尷尬？）唔會，反而唔識仲尷尬啦，我OK架！」
文:音樂組