農夫十年耕耘紅館賀一賀
以Rap闖出名堂的男子組合農夫，不知不覺已經合作十年，今年兩人更舉行演唱會當慶祝。問到是否仍堅持不Rap粗口歌，他們說：「個作品真係好需要都會嘅。」
由陸永和C君組成的農夫，早前推出專輯《O'FAMA》，陸永說：「今次係農夫最強信念同最主觀嘅專輯，因為以前比較客觀，風格虛無啲，都經歷過創作嘅『樽頸位』，今次就統一啲，有自己諗法。」
農夫雖以Rap響名堂，但今次新碟中亦有「全唱」歌曲，C君說：「咁我哋又冇唔慣，盡量嘗試，唔好介意唱成點，監製仲話唱到走音都唔緊要，最緊要攞到個Feel。」
玩Rap圈子細
原來農夫已經合作十年，陸永說：「冇人會知我哋合作十年。（點慶祝？）年中搞演唱會，今次個場會『升呢』去紅館。（火花？）梗係有，我哋好有熱誠，好耐冇試過兩個人一齊寫隻歌。」問到會否覺得變得商業化？C君說：「冇可能商業，如果商業嘅話冇可能Rap。（點睇Rap趨勢？）喺香港Rap嘅圈子真係好細，雖然有好多地下Rap嘅組合，但冇乜人留意佢哋，不過可以靠網絡世界。（堅持唔用粗口Rap？）個作品真係好需要就會用，但目前仍未試過有。」
陸永搵靚女友
兩人的感情生活比較低調，陸永表示不抗拒與圈中人拍拖，他說：「我鍾意靚女㗎，因為好睇啲。」而剛經歷情傷的C君，則表示已經完全康復。
採訪：專案組 攝影：林楠
化妝：MANYEE
髮型：Renton
場地：gi+