Mr.流動舞台大眾同JAM
人氣高企的樂隊Mr.深得廣告商愛錫，獲擲六位數字打造專屬音樂車，該流動舞台將巡迴各區，供途人隨時隨地即興玩音樂，延續Mr.「Everyone Concert」的概念！
樂隊Mr.本月初完成兩場紅館演唱會，會上座無虛席力證人氣爆燈，除獲唱片公司要求開演唱會Part2外，廣告商亦對他們寵愛有加，豪擲六位數字為他們打造專屬流動舞台。
大讚夠型
日前，Mr.率先試玩這輛專屬大貨車，結他手Dash直言：「我真係有興趣揸大貨車，不過未有時間去考牌，頭先第一眼睇到架車，已經即刻想揸住佢周圍去！」主音Alan大讚流動舞台夠晒型：「車出面有好多我哋演唱會嘅相，好多連我哋自己都未睇過，車廂入面仲有幾個攝影機，可以180度咁拍低你打鼓、玩音樂嘅過程，真係好有型！」
鼓手阿Tom見車廂中的靚鼓，即忍不住試玩，他說：「我哋廿七日就會喺呢架車上面玩歌，到時仲喺戶外，希望多啲人嚟睇，可以好似音樂節咁就最正！」Mr.更賣口乖指屆時有可樂解渴，不擔心歌迷會熱到口乾！
旅行充電
結他手MJ透露，完成演唱會後到了荷蘭旅行充電，近日熱愛寫網誌的他說：「嗰六日真係過得好輕鬆，我特登影咗好多相，遲啲就會放上Blog同歌迷分享。」而Ronny亦抽空到了吉隆坡撐好友廿四味的演唱會。小休後的Mr.將全力投入造歌，Dash謂：「依家要密鑼緊鼓造多啲歌畀老闆揀先。（儲歌做Part2？）如果開就要開夠十場！」
文、攝：音樂組