古天樂但求就手咀人妻君如
古天樂昨日獲七名靚女陪同出席活動，但坦言因太久未有親近女色，故有點不習慣。Dry到嘴唇爆坼的古仔更「強搶」吳君如作女伴，大爆二人私下相處如夫妻。
古天樂昨日以嘉賓身份出席Bally銅鑼灣專門店開幕酒會，同場還有七名女星，包括周秀娜、唐詩詠、楊愛瑾、傅穎、董敏莉、吳日言及梁靖琪，當中楊愛瑾以低胸短裙上陣，非常性感。
七星伴月唔習慣
古仔被笑指七星伴月，問到他是否很開心？他說：「有啲唔慣，我都已經好耐冇見過（咁多女仔），（邊個最養眼？）我都未睇到邊七個，個個打扮都好靚，我眼中最養眼係君如，直到戲拍完為止。」原來古仔正與吳君如拍攝電影《神奇俠侶》，他笑言：「喺大陸成個月拍戲，日日都係見到佢（君如），好少見到女性。」
現場所見古仔嘴唇爆坼，被笑指是否感情生活好Dry，他說：「唔係，同君如都好sweet，我同佢有咀戲。（佢咀到你爆坼？）唔係囉，我見到Peter（陳可辛）都唔係咁。」
米蘭工作兼叉電
古仔又自爆與君如私底下相處似兩公婆：「佢會煮嘢畀我食，天氣涼會提我着多件衫，喺Peter面前都係咁對我，又話掛住我，Peter都知。」被問到有指大陸拍戲能結識不少女性，但古仔表示完全不感覺到。他透露六月會隨品牌到米蘭一星期拍攝相片，他表示是難得的假期，希望到時父母可同行。
採訪：名人組