余文樂dry爆送樓徵女友

余文樂前晚連走兩場，分別出席「泰國電影群星夜」晚會及新片《志明與春嬌》的首映禮。余文樂近年工作不斷，私人時間買少見少，難怪前晚他出席首映時，自言「dry到阿媽都唔認得」！

拒評城城「藏嬌」

對於有傳他的好友郭富城送了一層樓給女友熊黛林作金屋藏嬌時，樂仔表示不知道及不欲多談，問到樂仔可有金屋藏嬌的意思？他笑言：「其實好難藏，記者實知道。（你dry咗好耐？）dry到阿媽都唔認得，劉偉強喺之前個活動仲叫我去追泰國公主，叫我幫佢勾幾笪地！」

樂仔續表示若有女友也會買層樓給對方，只是不知應否寫上對方的名字：「如果我寫咗佢個名，人哋又會誤會係佢養我。」

至於有否送過樓給前女友們？樂仔笑謂：「冇呢個機會，依家一有（女友）就送o架喇，有興趣就行埋嚟喇，送樓徵女友！」

唔敢摑泰國公主

另外，樂仔於首映舉行前又與導演劉偉強、溫碧霞等到四季酒店出席「泰國電影群星夜」晚會，而早前與樂仔合作拍片的泰國公主烏汶叻亦有出席活動。樂仔大談與泰國公主拍攝時的趣事：「我要打公主一巴，又唔想就住又唔敢用真力打，最後搵替身出手，我仲想返香港架！」

文：影視組