阿Sa有情義撐Ronald用情專一
蔡卓妍（阿Sa）分手後首度在港解畫，否認鄭中基（Ronald）房中有第三者的比堅尼，阿Sa被傳聞激到眼紅紅，還力撐Ronald為人專一，此外，Twins再度化身雙生兒力谷今日推出的新碟。
阿Sa前晚與陳偉霆、梁政珏、樊少皇、王晶等出席電影《美麗密令》感謝宴，昨午又與吳君如出席「預防子宮頸癌」活動，阿Sa都被追問有關與Ronald的分手傳聞，如有報道指她發現Ronald房中有不屬於她的比堅尼，才導致兩人分手、又指Ronald花弗，偷嗒天使及暗溝Angelababy，令阿Sa激動到眼紅紅說從來冇第三者，更直斥過分！
「點解傷害我哋」
阿Sa為舊愛澄清時，指大家是和平分手，不涉及任何傳聞：「佢唔係咁嘅人，我知道嗰時都好嬲，我哋已經分手，點解寫咁多嘢傷害我哋！」至於有傳她為做天后撇仔，阿Sa說：「我哋唔係同全世界拍拖，因涉及人格問題要為佢澄清，佢好專一。（係咪性格不合才分開？）主要係了解，兩個人相處中間經歷好多，唔好諗得咁複雜。為咗報道我哋都好煩，希望講完大家唔好再問。我哋係朋友仲有聯絡，係有共識地分手，見面唔會尷尬。（有傳分手為掩飾結婚？）分開唔涉及其他猜測。（心痛畀人咁話？）梗會受傷，已經唔係開心事，仲要畀人評頭品足。」
私事毋須交代
對於傳她和Ronald在外國有行禮但冇註冊，阿Sa拒絕回應：「呢啲係我私人事，唔使同人交代。（有冇後悔默認拍拖，搞到分手有咁多問題？）我從來唔會後悔。」至於Baby祝福他們早日復合，阿Sa只露出無奈笑容，助手即阻止記者再問。
備受分手困擾的阿Sa，仍要收拾心情專心籌備Twins演唱會，門票反應熱爆，內部超額認購數千張，要加場解決缺飛熱，連阿Sa的嫲嫲訂五十張飛都要cut。Twins並於今日推出《人人彈起》3CD專輯配合宣傳，隨碟附送兩套相集，Sa、嬌以雙生兒look拍照，似得連工作人員都認錯她們。
文：音樂組