李蘢怡封胸重生拒做廢人

Tiffany曾批模單賣性感而欠專長如同廢人，但對觀眾來說，她的火辣三點式泳衣造型仍記憶猶新。身為「過來人」的她深感後悔，現在堅決努力洗底：「依家想有啲轉變，想有啲突破，但一定唔會三點盡露同赤裸。我覺得之前嘅（性感）身份唔係咁好，依家改變咗之後，希望用時間去證明咁樣係好咗。」

相由心生

Tiffany坦言「封胸」後要作出心理調整：「以前低胸好易引人注意，依家着樽領出席活動真係少咗人留意，初時係唔慣。」但她感激新公司的安排：「以前間公司乜都接，係好多嘢做。依家新公司就揀過先接嚟做，工作量係少咗，不過啲工作就好正面，好似為幼稚園唱校歌咁，令我肩負起責任。」

從前敢言、現在慎言的Tiffany不再狠批模：「模嘅方向同市場唔同，有佢哋嘅優點同價值。」為了塑造新形象，她先從外貌入手：「你一睇我個樣就知我變咗，我個妝淡咗。」她相信相由心生，故積極增加內涵，落力學廚藝及練舞：「之前被封地獄廚神，咁我就去學整甜品畀同事食。去美國訓練嗰時成日自己煮嘢食，又會打電話畀媽咪學煮中菜，所以依家由去街市買餸揀材料，以至煮幾味都冇問題。」

李蘢怡笑言單看外貌已知她有改變，因為化了淡妝。

放大圖片

學習早睡

雖然Tiffany變得積極，不過生活習慣有待改變：「依家成日兩、三點先瞓，公司想我好似劉心悠咁十二點前瞓，依家努力緊。」 文：專案組

髮型：Matt@XENTER

髮型助手：Hei@XENTER

服裝：Guess