謝賢被飛嘲CoCo唔識寶
謝賢（四哥）與女友CoCo拍拖數年，一直表現糖黐豆，惟兩人原來已情海翻波，四哥昨日驚爆已與CoCo分手，但他仍如常拍攝廣告，心情似未受影響，認真專業﹗
年逾70歲的謝賢，昨日為其代言的「古漢養生精」，拍攝全新平面廣告硬照，身為三皇集團董事總經理的王賢誌（Vinci）亦前來探班。平時四哥出席活動或行街Shopping時，女友CoCo總會陪伴左右，但昨日未見女友蹤影。
單身生活更忙碌
問到為何未見CoCo？四哥驚爆二人分手消息，他說：「飛咗我囉，啲女人成日飛我，老婆又飛，女朋友又飛。」問到何時分手？四哥無厘頭說：「隨時飛，我畀人欺騙。（原因？）唔知點發生，唔知點結尾。（女友唔識寶？）係囉，但冇辦法，個天安排點就點，隨遇而安。」
四哥表示單身生活更為忙碌：「忙好多嘢，總之一日喺世上，都要有嘢做先得，退休唔啱我。」至於會否再拍劇？他說：「冇人請，我又貴又老。」記者指他仍是「新紮小生」，四哥開玩笑說：「唔係，紮咗就真。」
與霆鋒押後慶祝
對於兒子謝霆鋒在前晚「第四屆亞洲電影大獎」，贏得「最佳男配角」殊榮，四哥表示：「未有機會慶祝，等啲後生慶祝咗先，我哋老人家押後。（滿意霆鋒表現？）應該喎，做得呢行，梗係搏老命，老竇都搏老命，佢唔係唔搏呀？」談到媳婦張栢芝五月臨盆，問到有否準備禮物？四哥說：「畀個心咪得囉，對物質唔太重視。」
雖然與CoCo分手，但四哥仍精神奕奕工作，更換上粉色服裝拍攝。Vinci對四哥表現讚不絕口，Vinci說：「冇得彈。（考慮搵埋霆鋒一齊拍？）好貴呀，亦都好難。」
文：專案組 攝：李柏儒