吳君如放盡肉搏古仔
吳君如與古天樂為電影《神奇俠侶》開工，首日拍攝即「埋牙」拍激烈床戲，身為君如男友兼監製的陳可辛雖有監場，但被嘲睇到眼冤，睇到一半已離開，令君如與古仔拍得好放好開心。
君如、古仔、監製陳可辛、導演谷德昭昨日出席古裝喜劇《神奇俠侶》記者會暨潮流戲服時裝騷。君如、古仔除了與多位模特兒着上戲服行花生騷外，又分享拍攝新片心得。兩人首日開工即拍攝床上戲，古仔笑指君如男友陳可辛冇眼睇，睇到一半就走，君如亦笑指陳可辛走後，二人拍床戲好放好開心。
床戲超高難度
問到拍床戲當日，陳可辛是否特登前來監場？君如指當天是開工首日，剛好要開鏡拜神，故陳可辛才到場。問到拍床戲可有難度動作？君如表示：「今次我哋兩個係飾演有特異功能，所以比平常人更高難度。（床戲有冇特別動作？）梗係有！正呀！非普通人方法，又要拗腰又要掃爛啲杯杯碟碟。」
問古仔覺得打戲難還是床戲難？他說：「各有辛苦，床上戲係非一般性辛苦！而今次着住皮造嘅超人戲服，連背脊痕都𢱑唔到，打嘅時候件衫好重好辛苦。」
否認代替志雲
對於日前鄭希怡、田亮及何潤東在南京消遣遇襲，古仔與君如表示雖然在內地拍攝，但多數留房休息，不會外出。問君如是否會主持無綫清談節目代替《志雲飯局》？她表示不會再做清談節目，就連《星星同學會》亦不會做，見好就收。另外，古仔早前應中港城邀請，親自設計一個限量慈善相架「kool+」，為「古天樂慈善基金」籌款。
文：影視組