陳奕迅對住阿徐放肆晚晚咀
陳奕迅個唱前晚於紅館開鑼，他不避嫌獻唱謝安琪的《囍帖街》，期間又與女舞蹈員咀嘴並大唱話題之作《無人之境》，更直言晚晚錫唔同人，他謂：「有啲人可能覺得我好大膽唱前度緋聞女人嘅歌，咁唔通下下避？」
《DUO陳奕迅2010演唱會》前晚舉行首場演出，大玩歌曲Crossover配合DUO（雙面）主題，陳奕迅獻唱黃耀明的《禁色》時被女舞蹈員從後抱住，兩人又攬又咀近半分鐘，緊接唱出話題之作《無人之境》，但太太徐濠縈未有刻意睇實老公，只與好友交談及影相。
陳奕迅笑言錫女舞蹈員是「益咗佢」，但第二場可能錫男的：「首歌講愛係冇錯嘅，可能第四晚撲隻狗出嚟，咪錫隻狗囉！」
吐口水抹鞋
陳奕迅在Encore時說：「今日（前晚）父母都有嚟，我想送首歌畀佢哋、在座嘅人同我愛嘅人。」然後向住太太及女兒陳康堤獻唱《天下無雙》，場面溫馨。陳奕迅又唱張學友、草蜢及張國榮等多首別人的歌，模仿張國榮及梅艷芳的唱腔演繹《芳華絕代》，令人聽出耳油。陳奕迅自爆有歌迷以一千九百元買首行的門票，原本沒安排握手環節的他說：「我好擔心如果千九蚊買張飛，冇得握手咪好戇居？」說罷走向觀眾席握手。期間，他不慎刮花皮鞋，竟不顧衞生以口水抹鞋，更得戚地說：「呢個方法最快。」
由於不時甩嘴及唱錯歌詞，陳奕迅自言狀態不佳，希望沒令入場的朋友失望，又笑言沙聲將會成為潮流。訪問時陳奕迅坦言：「其實我都忟忟哋，已經盡量扮冇嘢，表現都係七十幾分，仲有進步空間。」
對於翻唱謝安琪的《囍帖街》，陳奕迅大方表示《囍》及緊接唱的《落花流水》都有「放下」的意思：「唔係講感情。（啲歌自己揀？）基本上係，我知每個人睇嘢有唔同，有人覺得我好大膽唱前度緋聞女人嘅歌，咁唔通下下避咩？唔通以後唔唱《無人之境》呀？」
文：音樂組 攝：唐豁莊、林楠