艾粒Donald牛一 女友帶頭滾
艾粒成員Donald與女友張詠恩（Jan）拍拖以來愛得癡纏，Jan早前趁男友牛一，相約關智斌、少爺占等好友為他歎火鍋慶祝，還突然拿出蛋糕及香檳大唱生日歌，令Donald既驚喜又感動。
Donald與女友Jan拍拖多年感情穩定，早前Jan為慶祝男友36歲牛一，出盡冧招，與關智斌（Kenny）、少爺占等好友夾計給男友生日驚喜。
Kenny悶悶不樂
當晚大約九時，Donald與Jan相約了好友少爺占與女友Tina、Kenny及男子組合Bliss成員Oscar等十多名友人，前往大坑一間火鍋店打邊爐，眾人揀選了店內較中央的位置而坐，壽星仔Donald還揸主意點了滿枱美食。
現場所見，眾人邊吃邊傾極為開懷，但單拖赴會的Kenny卻悶悶不樂，見他多次捽眼又伸懶腰，似乎極為疲倦。吃至尾聲時Jan即與同場的友人夾計仔，未幾即見她特意使開男友，吩咐他往座駕取物件。
男友甫步出店舖，Jan急急與Kenny等人取出生日蛋糕及香檳放於枱上，當壽星仔折返時，他們還把店內燈光校暗，齊齊大唱生日歌，Donald見狀即驚喜得笑個不停，感動得眼濕濕的他隨即拿起香檳作狀噴向眾人，嬉戲一輪後壽星仔即跟各好友碰杯慶祝及大合照。
壽星仔要夾錢
直至晚上約11時，少爺占便逐一向眾人收錢埋單，雖然是AA制，但身為壽星仔的Donald卻未有被厚待，亦要夾埋一份！埋單後，少爺占即拖着女友先行離開，Kenny則與Donald及Jan於街頭傾了一會後，才分道揚鑣往取車離開。
文、攝：追蹤組