梁漢文修心養性拉老婆食齋

曾多次醉倒街頭嘅梁漢文（Edmond），自從與女友林文慧（Karen）拉埋天窗後，戒蒲戒酒成個乖仔晒！就算佢呢排忙緊演唱會工作，都冇話忽略老婆，日前八太就見佢哋兩公婆拍拖撐枱腳，之後Edmond仲買咗大袋飲品，寧願返歸同老婆隊汽水，都唔想醉酒失禮人呢！

冇咗老婆喺身邊嘅Edmond，全程黑口黑面，十問九唔應。
冇咗老婆喺身邊嘅Edmond，全程黑口黑面，十問九唔應。

往年見到Edmond飲醉酒，唔係瞓垃圾堆就係打爆玻璃窗，搞到身邊扶住佢嘅朋友鬼咁狼狽，總之就醜態百出啦！之但係人大咗，心態亦都會隨住年紀而改變，就好似現年38歲嘅Edmond咁，後生嗰陣成日約埋班兄弟去唱K、隊酒、篤波等，夜生活仲精彩過佢嘅歌唱事業。不過，自從佢結咗婚做咗人老公之後，就話依家做完嘢唔想再四圍去，鍾意返屋企對住老婆。

夾餸晒恩愛

雖然Edmond啱啱忙完舅父尹志強嘅喪禮，依家又重新投入即將舉行嘅BIG FOUR演唱會，但八太有一晚就喺北角電器道一間齋舖，見到佢哋兩公婆喺度撐枱腳，期間Edmond仲好細心咁夾餸畀老婆食，鬼咁恩愛！食到十一點幾，Edmond埋單後，就去咗隔籬間便利店，掃咗一大袋紙包飲品同汽水，而Karen就坐咗喺架車度等，之後一齊返屋企慢慢飲。

Karen同Edmond食完齋離開餐廳。
  • Karen同Edmond食完齋離開餐廳。
Edmond（箭嘴示）喺便利店買咗大袋紙包飲品同汽水，同老婆返屋企慢慢飲。
  • Edmond（箭嘴示）喺便利店買咗大袋紙包飲品同汽水，同老婆返屋企慢慢飲。
雖然Edmond（右）同老婆（左）坐到離行離列，但見佢哋依然傾得好開心。
  • 雖然Edmond（右）同老婆（左）坐到離行離列，但見佢哋依然傾得好開心。

一支公黑面

另一晚，八太喺跑馬地又撞見梁生梁太，同埋兩位朋友喺街市樓上食飯，雖然席上佢哋坐到離行離列，但依然傾得好開心。食完飯，Edmond仲好樂意做埋柴可夫載埋兩位朋友離開。事隔幾晚，Edmond就一支公去咗銅鑼灣行街，收穫仲好豐富添！向來平易近人嘅Edmond，唔知係咪冇咗老婆喺身邊，全程黑口黑面，就算好聲好氣咁問佢嘢，依然十問九唔應，搞到八太都𢱑晒頭！咦？原來Edmond都係環保分子嚟㗎喎！點解？事關見佢呢幾日戴住嗰頂帽都係同一頂囉！