筱靖贈興：佢女人緣好旺

黃澤鋒與拍拖年多的女友陳麗麗昨日在屯門婚姻註冊處拉埋天窗，九月二十六日才補擺喜酒。兩人昨天未有穿上婚紗禮服，穿着波鞋行禮的澤鋒儀式時心情緊張，為太太戴上戒指時手震震，場面搞笑，他向太太說：「左手第四隻嘛，多謝你娶我。」兩人簽紙後連環咀不停，幸福溫馨。

黃澤鋒與陳麗麗咀個不停大晒幸福。

黃澤鋒、陳麗麗結婚，陳父與黃母任證婚人。

唔驚被踩場

澤鋒自言結婚前夕難以入眠，笑言感覺與拍戲大不同，而他表明婚後會積極「造人」。雖然近日澤鋒遭前女友謝小姐數臭，但他一於少理：「今日大喜日子，所有嘢簽完紙後都結束，今後只得一個太太叫陳麗麗，其他嘢唔理，最重要係家庭。」陳麗麗亦力撐老公：「之前都澄清咗！實有人開心同唔開心，件事反而令我哋感情好咗，因為我知佢冇講大話。」可擔心過有人到婚禮踩場？新任黃太表示：「唔係問題，都已經係事實。」澤鋒則說：「就算佢嚟，都可能嚟觀禮呢，大家正面啲去睇。」

食飯唔畀錢

另外，黃澤鋒前緋聞女友筱靖昨日為亞視宣傳，對於澤鋒被指曾一腳踏兩船，她說：「我哋只係朋友，係佢前女友簡單複雜化啫。」筱靖不諱言澤鋒女人緣好旺，兩人只限於食飯行街的朋友。她說：「當時佢銀根短缺，話要幫手，同班朋友一齊食飯，佢話冇（錢）叫我幫手畀住，我啲朋友都唔鍾意咁。同佢朋友都講唔上，佢同佢老婆依家就晒恩愛！」筱靖表示就算對方邀請出席婚宴，亦視乎有沒有時間。

文：影視組