呂慧儀搶波瞓地儀態拜拜
呂慧儀、張嘉兒、黃德斌與應屆港姐劉倩婷、李姿敏昨日出席「香港國際七人欖球賽2010」活動，席上各人大玩欖球遊戲，當中呂慧儀表現落力，更不顧儀態玩到瞓地，事後她表示：「中學時候有玩過，（同男定女玩？）梗係女仔，男仔體魄好強健，唔夠佢哋玩。（欖球好多碰撞？）冇所謂，有玩開籃球同排球，不過今日第一次喺草地玩，啲草濕濕哋，唔小心跣親。」而提到網上有傳北京靚仔乞丐「犀利哥」有機會加入演藝界一事，呂慧儀自言並非人人對這行感興趣，所以要順其自然。
此外，劉倩婷與李姿敏即將卸任港姐，二人表示將忙於宣傳港姐招募，並有意留港發展。劉倩婷則表示在英國讀書時經常睇欖球賽，又曾擔任男子欖球隊啦啦隊。另外，張嘉兒表示虎年旺財，將到內地登台搵真銀。