BIG FOUR內訌互爆私隱

許志安、梁漢文、張衞健、蘇永康即將以「BIG FOUR」名義開騷，健仔預告幾兄弟除了勁歌熱舞之外，隨時互爆私隱：「開Concert High起嚟，觀眾又High，口疏程度自然增強，所以私隱權對於我哋嚟講係絕對冇嘅！拋得個身出嚟搞BIG FOUR，預咗要還！」

康仔例牌遲到

四人受訪時先來預演互爆，安仔跟健仔直言梁炳冇乜壞話，更大讚他勤力兼ＥＱ最高，只好篤爆他一個小習慣：「佢一日三餐都係即食麵，仲要永遠都鍾意踎喺度食，着短褲腳毛又多，又戴埋黑框眼鏡，呢啲咪有性格囉！」至於康仔則被爆第一次開會就遲到兩個鐘，健仔笑說：「以為佢又係戴晒黑超全無悔意咁例牌唔講對唔住，點知第一句就講對唔住，學咗志偉。」

健仔同安仔笑梁炳腳毛長。

梁炳表示康仔負責他們的服裝，康仔搞笑說畀個方向啫！

排舞掛住吹水

輪到梁炳跟康仔報仇雪恨，康仔笑道：「許志安最唔聽話係襯衫方面，成日觀音頭掃把腳，上面打呔下面着短褲爛波鞋，好似電視台報體育咁。健仔排舞好Hea，安仔就懶型。」梁炳則大爆四人聚首一定玩多過乜：「每日六個鐘，吹水兩個鐘，玩個幾鐘，真正排舞得番兩個幾鐘，不過幾新鮮好玩。康仔少排舞，練完骨都痛埋。」四兄弟從個體變團隊，直言合作初期要時間磨合，安仔說：「開頭好煩，大家好忙乜都要度期，不過都係Happy Trouble。自己好Enjoy，覺得大家嘅關係好似新婚夫婦咁，又似跳Tango，一人一步，一前一後。」

文：專案組

攝：司徒國榮 　化妝：Maggie Lee

髮型：Billy Choi@Hair Culture（安）、Moe@Chin.Gi（康、文）

場地：彌敦酒店