陳豪昨日無懼緋聞纏身，於新劇拜神儀式上公然向佘詩曼送上提子，有情有義代對方抱不平，直言女仔貞節很重要，自己則冇有怕，深信觀眾懂得分辨真與假。
陳豪、佘詩曼、鍾嘉欣、李詩韻等昨日出席新劇《公主嫁到》拜神，緋聞男女陳豪與阿佘自然成為焦點，拍攝大合照時有後排演員大嗌「三好係陳豪嘅！」（阿佘於《宮心計》的角色），惹來一陣笑聲，不過兩位主角似乎未有聽進耳，還應要求大方拍照，及後阿佘做訪問時，拿着提子的陳豪路過更向伊人細心送上，不過卻堅拒餵對方。
「真金」不怕火
對於與阿佘因該劇傳緋聞，陳豪謂：「冇咩特別，唔好太過分囉！做到阿佘都嬲（係咪支持佢採取法律行動？）希望快啲平息，我就唔怕，一句到尾『真金不怕洪爐火』，（係咪已經有個『真金』（廖碧兒）所以唔驚？）呢啲係你講，唔係我意思。」談到阿佘惹緋聞已非首次，為何今次才採取法律行動，陳豪坦言寫幾次冇所謂，但若加罪於人造成傷害就唔啱，更謂：「女仔最緊要係貞節，所以希望唔好再延續落去。」
唔會感尷尬
阿佘對於陳豪拒餵提子則笑謂：「唔需要刻意做令人誤會嘅嘢（陳豪話你好嬲？）都係，因為有少少踩到我底線，不過依家已經進入法律程序，唔方便講太多。」談到與陳豪的緋聞被同劇演員開玩笑，阿佘謂：「都係好事，起碼『三好』咁多人捧場!（見陳豪尷唔尷尬？）做咩要尷尬，同事嘛！（會唔會避忌？）如果係咁就好難說服自己同觀眾啦！」阿佘透露現時感情狀況是期望及等待，不過一切順其自然。
文：影視組