楊洛婷昨日身穿紅色旗袍出席廚具品牌活動，並親自下廚示範炆豬手及葱油餅，表現有板有眼。她透露新年期間到男友Dear Jane成員Tim家中拜年，更被對方的嫲嫲催婚：「佢嫲嫲問我哋幾時拉埋天窗，我就扮唔明個意思，之後轉話題。」
楊洛婷於新年前搬了新居，但她非常抗拒跟男友同居，並謂：「我想有多啲私人時間，將來結婚對足幾十年又會厭！（男友有求婚？）冇呀，我哋拍拖四年，我要結婚都係想生仔，但暫時冇諗，依家成日約會仲開心啦，好有激情！」至於男友求婚會否答應？她說：「睇吓粒鑽石幾多卡啦，我唔貪心，至少都要兩卡，仲要係粉紅色鑽石！」
