22/02/2010

播放本新聞相關短片

吳卓羲親生仔唔怕認

吳卓羲(Ron)昨日出席劇集宣傳活動,期間抽中一隻足金金虎,隨即被杜汶澤等同劇演員起哄高呼「造馬」,並要求重抽,不過Ron卻懶理他們,直言幸運一定要攞,還會將之轉贈母親。

Ron、何韻詩、杜汶澤及馬賽等昨日為新劇《女王辦公室》宣傳,靈魂人物汪明荃(阿姐)因身在日本旅行缺席,劇組即拿出阿姐紙板公仔代替,而每位演員亦輪流與「紙板阿姐」對話,場面惹笑。

何韻詩拒重溫舊作

及後Ron於抽獎環節抽中一隻足金金虎,同劇演員見狀不忘揶揄一番,「造馬」、「重抽」聲音更是此起彼落,當中阿澤抵死地謂:「呢啲咪係親生仔囉!」不過Ron卻一副懶理姿態,笑謂:「係因為親生囉!但真係抽出嚟,入面都有好多親生仔,只不過我好彩啲,其實牛年我都抽到隻牛仔,新一年新開始,係好運。(人哋叫你攞番出嚟喎!)彩就一定要攞,攞番出嚟係另一回事,我會好似上次攞牛仔咁畀阿媽。」

而對於新劇承接收視不錯的《畢打自己人》,阿詩仍表示有信心,望能夠達30點,笑指近排既要拍電影,又要為劇集宣傳,身份似演員多於歌手,問到會否欣賞過往作品,阿詩謂:「驚驚哋,好似《豪情》播就會飛撲電視度整熄佢,好恐怖。(因為床戲?)慘過床戲,因為有場戲要我同陳奕迅講Baby。」早前憑新戲提名金像獎「最佳女配角」,阿詩直言鼓勵很大,雖然不知道會否有機會拿獎,但以歌手身份演戲,認為入圍已得到演員身份的認同,對她來說等同開了一條新路線,故寄望未來日子能多拍電影。

文:影視組