邵氏賀歲片《72家租客》票房理想，邵氏兄弟（香港）有限公司電影製作總監黃家禧、電視廣播有限公司製作資源部總監樂易玲、《72》監製曾志偉、主角張學友、袁詠儀（靚靚）、黃宗澤、鍾嘉欣等藝人雲集尖沙咀某酒家作新春團拜。志偉祝酒答謝各界群策群力，令到電影取得佳績，又不忘大讚邵氏批製作費十分疏爽，淡化之前「無言感激」事件引起的連串風波。

靚靚說：「好開心票房如志偉所講做咗第一，黐住志偉都有運行，有機會都想再拍賀歲片。我撞過黃百鳴，佢話會贏我哋少少。我哋套戲幾分鐘一個笑位，又唔夾硬。（睇咗《花田囍事2010》未？）本來諗住包場睇，以前試過約埋郭富城成班人包場。（見唔見熊黛林？）吓？邊個林呀？我識張智霖。熊黛林？我梗識，佢係模特兒、高大、皮膚好。（派咗利是畀佢未？）新年見咗好多人，總之個個都有派。」

無綫及邵氏高層為《72》一片報捷大搞慶功。

黃宗澤新年派利是大家開心。

學友票房少有冠軍

志偉談到《花》片說：「我睇咗，覺得OK，比之前嗰年有進步，不過蝕底在古裝。（吳君如話《72》廣告如同催眠。）宣傳係有啲過火，好多謝觀眾支持，送咗票房冠軍咁大份禮物畀我，我每日check票房，知道爆滿就yeah！觀眾眼睛雪亮，見到港產片贏西片好開心，拍呢齣戲好辛苦，抖吓先再諗做導演。」

抱病現身的學友說：「我以往拍戲好少做到票房冧巴溫。（出年再拍賀歲片？）唔會刻意，今次係志偉叫我，我至拍。」

文：影視組