金牌大風前晚舉行春茗晚宴，被指獲新老闆龐維仁力撐而重執帥印的黃柏高，大合照時風騷與老闆們齊齊企，而CEO陳輝虹卻被冷落一旁，連金牌一姐鄧麗欣（Stephy）亦賣口乖謂：「我不嬲都好崇拜Paco！」
金牌大風前晚在尖沙咀舉行春茗晚宴，新老闆龐維仁、老闆鄭東漢、太子鄭中基、CEO陳輝虹、黃柏高、金牌一姐鄧麗欣及其緋聞男友方力申、黃百鳴及兒子黃子桓等紛紛出席。有傳黃柏高獲好友龐維仁力撐而重掌大權，大合照時太子鄭中基亦與他搭晒膊頭，又與兩位老闆排排企狀甚友好，但CEO陳輝虹則站在吳雨霏旁邊，明顯被冷落。而金牌大風有別往年慣例，未有高層向傳媒講述未來動向，黃柏高及鄭中基亦拒絕受訪。
唔認將被飛
對於黃柏高重掌大權，Stephy表示未有所聞：「如果有安排公司會開會，我淨係知道龐生注資而Paco（黃柏高）會繼續留低，對我嚟講冇分別，向來我都會同Paco商量好多嘢。」對於報道指黃柏高將飛起埋堆太子黨的小方及鄧麗欣，對此Stephy謂：「我不嬲都好崇拜Paco！冇啲咁嘅事。」
抽中五百蚊
另外，昨日Stephy為新碟《Music Cafe》舉行簽唱會，獲與自稱Alex的小朋友送朱古力花及錫面珠。她透露在春茗抽中五百元現金獎：「兩位老闆好厲害，拎咗六位數字現金出嚟抽，一疊疊銀紙咁拎出嚟！（邊個抽最多？）我好朋友小方囉，佢抽到一萬蚊。（分一半？）冇呀，佢話會送禮物同請食飯囉！」對於有份演出的《72家租客》票房達二千萬，Stephy表示好滿意，希望可以參與更多電影。
文：音樂組