曾志偉昨晚現身電影團拜活動，談及與尹佬最後獨處時刻之感人過程。他稱尹佬當時已看不見、講不出。志偉說時雖眼泛淚光，但強調得知尹佬離去時沒有流淚，因對尹佬來說，其實是一種解脫。
剛從外地返港的志偉，出席其監製的電影《72家租客》的團拜活動。志偉與剛離世的尹佬非常老友，到場時即被記者追問有關尹佬事宜。
新十五後搞追悼會
晚上八時到場的志偉表示，兩小時前才從尹佬家人口中得知火葬消息。他說：「其實尹佬意願係唔想麻煩人，所以咁樣做咗先。（追悼會邊個單位搞？）所有朋友都想參與，正通知緊各界，亦曾經打過畀梁漢文。當時佢喺火葬場，要等佢落山再通電話，經商量後，過咗新十五（即三月）後，餘下嘅嘢都唔急，以大家能參與為原則。（擔唔擔心米雪？）當然啦！」
志偉透露，身患鼻咽癌的尹佬在年廿四、五已經停藥。他又表示尹佬在那階段不肯見其他人，只肯見米雪，惟志偉、譚詠麟和七、八位好友探訪，卻得尹佬接待，並與每人在房間獨處一段時間。志偉談及與尹佬獨處時眼泛淚光，但卻強調已經為尹佬流乾眼淚。
志偉說：「今年係我近年開心嘅新年，因為自己套片收得，但收到尹佬消息就好唔開心！我咁多朋友走，唯獨尹佬走自己冇眼淚，其實對尹佬嚟講係一種解脫，年廿四、五佢已經停藥。我曾經去探佢，當時佢已經睇唔到、講唔到，我哋去到，尹佬都肯見我哋，佢仲同我哋每個人喺間房單獨過咗一段時間，大家好用力咁握住對方隻手嚟感覺。」尹佬病發後期曾搬往大埔住，為了鍛煉日漸虛弱的身體，常在屋外跑步。但志偉稱當時尹佬經常被狗仔隊偷拍，令到他要躲起來以致身體愈來愈虛弱。
李珊珊關心在心中
另外，李珊珊出席活動時表示，與尹佬認識多年，不捨對方離世，大讚尹佬對球壇作出很大貢獻。但她不會致電問候米雪，關心在心中。而與尹佬相識近卅年、曾一齊代表香港出賽的張國強，大讚米雪堅強，但因怕騷擾尹佬休息，已半年沒見對方。
文：影視組