祖兒與Eason昨日出席麥當勞35周年誌慶活動，大會為兩人分別以豬柳蛋漢堡包包裝紙及魚柳包包裝紙設計成連身裙及西裝，與三百五十名青少年齊齊跳竹舞創健力士世界紀錄，兩人於大合照時齊齊跳起，身上的包裝紙即裂開，幸好有打底兩人才不至走光。

晚晚暖氈好溫暖

祖兒說：「頭先整爛咗少少呀，好彩冇走光！今個農曆新年冇出埠，做咗好多平時冇做嘅嘢，就係開party、賭錢同埋打麻雀，我同阿媽仲打到黐住張枱，啲朋友走都唔捨得起身，叫佢哋自己開門走。（發咗新年財？）冇發呀，我哋呢啲為興趣啫。」問她好友何韻詩有否送情人節禮物？祖兒即反問：「點解要送呀？（好朋友嘛。）好朋友又唔係情侶，不過都好溫馨，因為我每晚都開暖氈瞓！」

Eason、祖兒落場跳竹舞，玩個不亦樂乎。

350名青少年齊跳竹舞創健力士紀錄。

Eason嘆家中冷清

祖兒自爆首次討得Eason的利是：「佢平時扮唔記得，但係今年我哋一齊做春節晚會，於是幾個女仔特登上去同佢請安討利是。」Eason表示原本已準備好利是予記者朋友，但擔心唔夠派：「我結婚都咁低調，就知我係咩人啦！（預幾多錢派利是？）冇預，唔夠咪再『唱』囉，好似今日（即昨日）都估唔到咁多記者，下次『唱』多啲硬幣啦！」他指家中沒甚新年氣氛：「又大又凍又冇熱水又冇暖氣，我哋呢啲都係表面風光。（囡囡康堤同你拜年？）冇喎，初一都係瞓覺，情人節都冇慶祝又冇送禮。」

另外，祖兒連續第三年為運動服品牌Reebok擔任代言人並拍攝全新平面廣告，廣告商邀得倫敦名攝影師Diego Merino操刀，要祖兒在彈彈球上喪跳一日亦毫冇倦意，大讚她活力十足。

文：音樂組