與尹志強非常老友的黃興桂，尹佬去世當天曾與米雪通電話，信念堅強的她表示，因不想於新春期間打擾親友，故會於新十五後才才辦悼念活動。他又表示會盡量由新加坡返港送尹佬最後一程，並準備了悼詞向尹佬致敬：「尹佬係一個喺任何場合都舉足輕重嘅人，佢嘅態度同EQ認咗第二冇人敢認第一。至於米雪，係我心目中嘅鐵娘子，簡直係Steel Magnolia（鋼做的木蘭花）。」
怕醜仔變開心果
尹志強於七四年「上山」効力南華，其時南華的攻擊主力，正是有「神童偉」之稱的黃文偉。兩人出道時經歷如出一轍，黃文偉十六歲亮相甲組，而尹佬十八歲加盟南華，偉哥與藝人白茵結婚，尹佬又與藝人米雪相戀，都是哄動一時的盛事。
黃文偉回憶說：「初期嘅尹佬比較羞澀，好少出聲。後來大家熟落咗，先知道尹佬性格好開朗，好快就成為球隊內嘅開心果。」兩人非常老友，經常結伴遊埠，足迹走遍大半個地球。對於尹佬球場上的表現，黃文偉指：「尹佬嘅腳法只算普通，但頭槌好出色，佢好勤力走動，非常搏命，隊友都會受佢影響而多走幾步。」
拚勁十足似坦克
尹志強對後輩很友善，比他小兩年的「細鬼」張志德及山度士都曾得他提攜，故兩人對尹佬非常尊敬。細鬼八二年上山加盟南華，與尹佬同隊，自此成為好朋友。
山度士八六年加盟南華，與尹佬曾有短暫隊友緣。他說：「尹佬喺球場拚勁十足，鬥志旺盛，都係我哋後輩嘅學習對象。我個人認為，球場上尹佬係一架會飛嘅坦克車！」