尹佬與鼻咽癌搏鬥十八年，終不敵病魔撒手人寰，幸有米雪一直陪伴走完最後一程。二人恩愛如夫妻，即使從未承認結婚，尹佬都以太太稱呼米雪，尹佬妹妹亦稱米雪為阿嫂，連日來米雪亦以「未亡人」身份為男友後事奔走。
昨日，米雪舉行記者會，尹佬外甥梁漢文、晨曦足球隊領隊周文曦及廿位球員、尹佬生前好友李子雄、鍾志光及前隊友陳發枝、甄力健等亦到場支持米雪。記者會吸引近百傳媒採訪，但不設提問，順序由梁漢文、米雪及好友發表感受，短短十分鐘便結束。
口震震讀貓紙
架上墨鏡、化上淡妝的米雪，由尹佬妹妹Connie拖着進場，因記者眾多地方淺窄，現場擾攘了一分鐘，米雪即主持大局維持秩序。其後她強忍悲傷擠出微笑，拿着「貓紙」口震震說：「我代表尹佬多謝每位關心佢嘅朋友，我好感謝上天畀佢一段咁美好嘅人生，感謝上天畀佢孝順、樂天、樂觀、平日帶畀人歡樂嘅性格，佢走嘅時候十分安詳、堅強、勇敢，佢堅強、勇敢嘅精神，佢對生命嘅熾熱，永遠喺我哋心中，永遠記住佢，上天一定會對好人作最好嘅安排，我哋永遠懷念佢！亦感謝球迷、醫護人員、傳媒朋友嘅愛錫。」期間，米雪兩度傷心嗚咽，並三度向傳媒鞠躬致謝。
至於尹佬的後事，米雪表示稍後會有追悼會，但因尹佬很多好友都不在港，要待他們返港後研究再作決定。米雪又請傳媒給予空間，不要騷擾尹佬家人及她的同事。昨晚，米雪繼續返無綫開工，專業精神可嘉。
認屍難忍淚水
此外，對於尹佬妹妹以「阿嫂」稱呼，米雪助手洪小姐代覆：「尹生家人一向係咁叫佢，但係咪真係註咗冊要佢哋家人至知。」至於有報道指尹佬離世時體重只有八十多磅，洪小姐否認，並謂尹生離世時過百磅。而Connie與米雪出席記招後，再聯同尹佬另一位妹妹及兩位男親友到沙田富山殮房認屍，兩妹雙雙落淚。完成手續後，尹佬兩妹離開殮房時，被問到尹佬身後事如何安排？只說：「等阿嫂安排啦。（『阿嫂』即係指米雪？）係呀，係呀！」之後眾人上車離開。
文：影視組