踏入虎年，「長腳蟹」呂慧儀（Koni）和「新咪神」高海寧即各展所長，前者穿上幻彩低胸豹紋短裙騷長腿，後者則以黑豹jump suit迎戰，34D玲瓏身材盡現，難怪Koni看到眼都唔眨：「嘩，你身材真係好勁！」為扮得神似，二人戴上貓耳仔和長毛尾，拍照時更「上晒身」獸性大發張牙舞爪，高海寧笑說：「梗係似啦！我係老虎女，不過我一啲都唔惡，因為我係冬天出世，只係鍾意瞓覺，屬『懶虎』，無咁辛苦㗎。」

注定老夫少妻

高海寧直言是個迷信之人，知道今年虎年犯太歲即去還神兼祈福，她說：「之前有去攝太歲，蘇民峰師傅話要喺農曆一月同七月去洗牙或捐血，如果有時間，我兩樣都做齊，咁就可以逢凶化吉。」問到新年願望？她笑說：「最好行桃花運，人緣好即係有觀眾緣，但蘇師傅話我真命天子要過多幾年先出現，將來老公一定唔係後生仔，可以大我好多，但叫我唔使擔心，話我一定嫁得出！」

屬狗的Koni亦揚言要行正桃花，她笑說：「爛桃花我唔要，緣分嘅嘢好難講，結婚講唔埋，如果突然遇到合眼緣都會嫁，呢啲係上天注定。」

祈事業發展好

兩位索女當然唔憂嫁，但現階段更希望事業有好發展，Koni解釋：「其實我事業未算好好，希望新一年可以拍多啲電影同做多啲司儀工作，因為想買層樓畀爸爸媽媽，想佢哋早啲退休，唔使再擔心我。」而高海寧就希望先買車，她笑說：「因為爸爸鍾意揸車，最好買架七人車，方便成家人出去兜風。」

文：專案組

攝：沈健程

場地：MEGU Modern Japanses Cuisine

服裝：Arrogant Cat

高海寧髮型：Match @ Hair