Jessica C.在大年初一響警鐘拜年，鬼馬的她甫穿上虎紋比堅尼，即老虎女「上身」，嘟起誘惑小嘴，使出虎爪抓住粉絲的心。慣用英語的她更入鄉隨俗，用半鹹不淡的廣東話拜年：「『拱起』（恭喜）發財！」她亦對傳統的新年裝飾充滿興趣，不停向人請教「福」字的正音及意思。

賺七位數

去年憑「警鐘胸」彈起的Jessica，在短短大半年時間密密接工作，荷包進帳不少：「賺咗7位數字，好滿意自己嘅成績，初初嚟香港發展都冇咩期望，但突然『嘭』一聲彈起，真係連自己都預計唔到。」

Jessica於去年做到冇停手，新年期間特意向公司請假，飛去意大利米蘭充電，除了購物之外，還日日陪住男友Sergio，更為他準備了情人節禮物：「好想見佢，所以飛去搵佢，咁啱過年，所以都會帶啲賀年食品畀佢，亦都買咗咖啡機，仲會焗曲奇餅畀佢做情人節禮物。」

環遊世界

問到Jessica送甚麼驚喜禮物給男友時，她馬上雀躍地說：「最大嘅驚喜咪係我囉！本來都想秘密咁飛去搵佢，等佢有個神秘大驚喜，但真係好難保持神秘，所以最後都係話咗畀佢知。」

Jessica不只對男友體貼，賺到盆滿缽滿的她亦很有孝心：「賺咗嘅錢都係儲埋佢，想喺芝加哥買屋畀屋企人，亦都好想請佢哋旅行，最好係環遊世界，因為媽媽已經60歲喇。」

文：林嘉慈　攝：黎志輝