潮媽陳慧琳（Kelly）虎年生威，親自揮筆寫下「蝦餃長大」及「財源滾滾來我袋」兩大揮春，祝福囝囝「蝦餃王」劉昇快高長大，老公劉建浩生意滔滔，賺錢進貢「老虎乸」。
幸福潮媽Kelly首次一家三口過年，心情特別興奮，還費煞思量諗了兩個揮春寫給囝囝和老公：「『蝦餃長大』送畀囝囝，希望佢快高長大，佢依家廿四磅好肥，係超大ＢＢ，雖然我抱佢抱到腰痛，醫生叫我要注意姿勢，但每次見到佢就好開心，乜煩惱都冇晒，有時仲覺得時間唔夠用，見極都唔夠，心想：『咁快瞓嗱？』」
放假陪仔瞓
「蝦餃王」已七個月大，Kelly只與寶貝仔同床共寢——兩次咁多，Kelly說：「一定要放假至可以同床瞓，如果第二日要開工要見人，我會頂唔順，因為陪佢瞓我唔會瞓得熟，佢一郁我就醒，不過春節我放三、四日假，終於可以陪佢瞓嘞。」
而站在「天降財虎」前拍照的Kelly，在財「虎」拱照下，想出別出心裁的揮春給老公，就是「財源滾滾來我袋」，她笑說：「我幫佢keep住啲錢，將來留畀個仔。（keep埋好多？）佢一次過入幾個月家用畀我秘書，交租、雜費、家用，唔使我煩，我唔會問佢攞錢，好核突。（找信用卡數？）唔好咁無良，自己使自己錢開心啲，唔係賺嚟做乜，我一個月開支幾萬蚊，嚇死佢。」
完美現代女
講到新年願望，Kelly希望家庭、事業兼顧，做個完美現代女性先叻。何時再做媽咪？抱着張叔平設計「虎ＢＢ」的Kelly說：「最快都要出年，依家囝囝喺我身上大力跳，傷口都仲痛。」
有此一着
潮媽Kelly身材高挑，衣着向來有品味，簡單一件外套配襯熱褲，加上今季最hit的涼鞋款長boots，凸顯一雙修長美腿，又靚又潮。
文：音樂組