闊別樂壇兩年的Twins，終於在虎年發威，落實在4月16、17日在紅館「合體」開演唱會，據知中、台、星馬及澳洲等Twins Fan Club逾千歌迷已計劃組團來港熱撐。
行將踏入虎年，Twins即大發雌威，為迎接十周年紀念，兩位好姊妹終於「大團圓」！迄今距4月的演唱會還有兩個月，但一眾Twins迷已「餓歌」兩年，早前Sa嬌已秘密錄了一首新歌《人人彈起》作為演唱會主題曲，希望到時全場歌迷聞歌聲都能興奮到彈起，同時寓意虎年Twins能步步高陞！
阿嬌無錫過年
自宣布Twins「合體」開騷後即掀撲飛潮，經理人霍汶希說內部訂票已爆滿：「唔使再打畀我啦，我冇飛呀！」無綫《勁歌金曲》更為Twins製作特輯作為演唱會前奏，當晚二女會演唱多首串燒經典金曲為個唱熱身。
今日已是農曆年大除夕，阿嬌身在內地拍劇集《靈珠傳說》，嬌媽更帶埋蘿蔔糕及賀年食物飛往無錫陪阿嬌過年。因Twins新歲仍各有各忙，Sa嬌特意提早吃湯圓預先「團年」。對Twins「合體」，她們異口同聲說一直沒有分開過：「就好似夫妻咁，只係大家工作唔同，少咗一齊啫。」
阿Sa等開飯堂
提到賀年食品，阿Sa力讚嫲嫲的自家年糕及蘿蔔糕最好味，好食到停唔到口，她試過一人食了兩底，搞到「有入冇出」滯足幾日。阿嬌則大讚阿Sa遺傳了嫲嫲的廚藝天分，試過阿Sa的泰式鳳爪及牛肉沙律絕不失禮。可會將廚藝發揚光大？阿Sa笑言：「最衰依家生意難搞，唔係我實開間『阿Sa飯堂』等大家可以嚟捧場。」阿嬌最擅長煎牛扒，可媲美酒店扒房手勢。
文：音樂組
場地：香港珀麗酒店