葉梁美蘭：

睇到報紙就忍唔住喊，我極度鍾意佢，依家時裝界嘅鬼才冇乜幾多個咁creative，佢同Marc Jacobs都上緊位，做乜自殺？做得時裝都係感性人，佢係奇才仲感性，真係好惋惜、好心痛。個牌子冇咗佢就等於冇靈魂，依家可能取消三月去巴黎睇佢嘅騷。

陳嘉容：

真係好可惜，佢設計天馬行空，時裝界好難得有咁creative嘅設計師，每季都有驚喜！（有冇買佢系列？）我未入行都有留意佢設計，真係好新穎，坦白講，每季一定會留意，我都有件McQueen西裝套裝。

何國鉦：

佢好年輕又有才華，人生當然會有唔如意同壓力，佢真係時裝界一個鬼才，設計好有個人風格，每次做騷都會有大驚喜。其實要演繹McQueen嘅服飾，無論神髓或整個造型都好難，Lady GaGa就係佼佼者。

鄭兆良：

近年fashion界有好多不幸事發生，例如YSL過身、Christian Lacroix同Yohji Yamamoto都申請破產保護等，McQueen喺佢嗰個generation嚟講，好有自己睇法，佢設計玩嘢之餘，亦肯做commercial設計，所以佢做乜都賣得，自殺好愚蠢，唔應該有樣學樣。

馬詩慧：

佢每季嘅設計都令人好讚嘆，好似藝術品咁，睇佢嘅騷好似睇緊Drama。我第一件買嘅McQueen作品喺七、八年前，係一件黑色Jacket，個剪裁好靚。

邱李茂琪：

好突然，佢得四十歲，好有才華，真係好可惜，依家已經變成一個傳奇。我好多時見到朋友着得好靚嘅衫，都係出自佢嘅手筆。