Alexander McQueen前日在其倫敦寓所吊頸自盡，結束光輝而短暫的四十年生命。前日早上十時救護車接報到場，至下午四時四十五分將其遺體運走。有指McQueen自殺是不堪喪母之痛，而警方則表示McQueen死因無可疑，不過卻發現其手上有傷口，估計他非首次自殺。McQueen的死訊傳出後，全球粉絲皆表現傷痛，其中剛於全新大碟中穿上McQueen新裝的容祖兒，雖身在北京，但獲悉「偶像」死訊後即致電同為頭號fans的好友黃偉文（Wyman），兩人同嘆無奈。

祖兒坦言McQueen的離開，是時裝界一大損失：「一個咁有才華同天分嘅人逝世，實在令人感到好惋惜。我好鍾意佢，亦支持咗佢好多年，自己都着咗佢嘅衫幾年，舊年叱咤頒獎禮都係着佢嘅衫，而啱啱新碟着嘅棗紅色毛毛衫都係McQueen架！（傳佢受唔住喪母打擊？）孝順係好重要，但係我諗佢媽咪都唔想睇到個仔咁做。或者設計師係藝術家，比較感性，一時睇唔開就做傻事。」

創作理念華麗摩登

至於Wyman亦顯得非常難過：「鍾意時裝嘅人就會鍾意McQueen，佢係英國國寶級嘅時裝設計師，佢同我同年。其實呢兩季佢嘅設計我都好鍾意，作為時裝人，交咗咁好嘅功課，留低咗一個好好嘅回憶畀大家，唔知嚟緊仲會唔會有佢嘅show？可能啱啱一月舉行嗰個男裝就係佢嘅遺作。」Wyman又大讚McQueen是個天才，他續說：「佢嘅設計好有舞台feel，又有天馬行空嘅創作理念，華麗得嚟又摩登，時裝界冇乜邊幾個做到。」Wyman又謂這幾天要打電話到香港時裝店預訂多幾件McQueen的服飾，因為他相信將有不少人搶購。

蘇永康：我好難過

同樣愛穿McQueen的陳慧琳則表現驚訝，她感慨時裝界將少了一個「鬼才」，又認為任何事都有解決的辦法，毋須選擇了結生命。打從95年起已愛穿McQueen設計的蘇永康則表現激動：「作為一個時裝愛好者，知道呢個消息實在太難過！」梁詠琪亦說：「好可惜，McQueen佢太叻、太有才華，可能因為太專注自己嘅作品反而忽略咗內心深處，其實佢都需要人關心！希望日後有人遇到挫敗同失去至親嘅人都可以積極面對，唔好自尋短見，好多身邊人都好愛錫佢哋！」

文：名人組