騎呢發現
唔好以為銀包淨係得身份證呢啲行嘢，原來仲會有一啲驚喜小發現添！
阿Sa Chanel 黑皮大銀包
「我對大銀包特別鍾情，用咗7千幾蚊買嘅，乜都放落去，好似卡片套、尼泊爾助養小朋友嘅合照。我又經常四圍飛，銀包內有唔同貨幣，好似美金、新台幣、汶萊幣同人民幣都有。」阿Sa還自爆曾試過畀人「打荷包」，她說：「入行後買咗個幾千蚊Hermes銀包，點知喺街畀人割袋偷走。」
徐子珊 Porter銀包
「大概十年前，有次同一位Uncle食飯，Uncle開咗支茅台酒，打開酒塞之際，發現有張一元美金，Uncle話呢個係幸福象徵，佢從未遇過，係酒廠放入去嘅，但佢飲過幾千支酒都係第一次遇到，於是佢將張美金送畀我，我一直保存到依家，希望可以為我帶來幸運。」
Sweet爆一族
由男朋友或至親送嘅銀包，帶喺身當然會成日諗起對方，仲唔sweet爆！
椋名凜 LV銀包
「個銀包係我爹哋媽咪喺我上年生日時，特登由日本寄過嚟送畀我嘅，我銀包入面一定會有我本Passport喇，因為成日都要周圍飛，由我做Model開始到依家近十年，一直都未試過唔帶，佢係成個銀包入面最重要嘅嘢嚟。」
莊思敏 Chanel銀包
「個銀包係阿Deep（男友吳浩康）喺上年聖誕送畀我嘅禮物，有一樣我去到邊都會帶住嘅嘢就係身份證，我覺得銀包最緊要有身份證同錢，不過我唔會帶太多現金喺身，除非有嘢要買，但最多都係帶幾千蚊，帶太多錢喺身怕危險。」
出盡符弗
Ana R.、傅穎、羽翹和Lavina都愛在銀包中放一些幸運小物增強運勢，催吉避凶！
傅穎 BV銀包
「呢個青綠色銀包好Sharp，感覺好Fresh，裏面除咗錢、信用卡、身份證，仲有我鍾意嘅Melody膠布，有備無患，至於呢封利是，係媽咪畀我，保我平安，所以我去到邊都會一直袋住。」
Ana R. Longchamp銀包
「我個銀包係個客送畀我嘅，人哋話用其他人送贈嘅銀包會帶嚟好運。我個銀包放嘅主要都係Credit Card、Discount Card同埋Gym Card。而我去到邊都一定會帶住喺身嘅嘢就係呢個玉觀音，佢會為我帶嚟平安，同埋保佑我。」
Lavina Vivienne Westwood銀包
「我放咗好多自己同埋好朋友嘅靚相，同埋入面只係擺八達通、提款卡、信用卡等等實用嘢，仲有一個小小嘅符保平安添！」
羽翹 Salad銀包
「銀包內一定要放有我嘅醫生覆診卡，因為我有耳水不平衡，經常都要睇醫生，因此相熟醫生嘅卡片一定不可離身。另外，我媽媽都有為我求咗一道太歲符，我都有放在銀包內！」
文：專案組