阿倫每年新春必作東搞聚會，豪請旗下藝人食團年飯，趁佳節聚首一堂，今年他相約克勤、Emme及Greg食盆菜，寓意個個賺到盆滿缽滿。阿倫視旗下藝人如親生仔女，特別關懷Emme，頻頻叫她食蝦、鮑魚，令Emme大感窩心。

財神眷顧大派利是

口甜舌滑的阿倫大講吉利說話：「食蝦就笑哈哈，食鮑魚就包保年年有餘。」而頗受「四大唱片」公司和無綫不咬弦事件影響宣傳的克勤笑說：「我一知免費有得食，拍緊MV都要飛撲嚟啦，依家搵食艱難，我啱啱出咗新碟，但做宣傳好難，咁嘅時勢，梗係慳得一餐得一餐。」句句有骨落地。

工作人員即起哄開局玩「財富大轉移」測試財運，克勤指阿倫最得財神眷顧，每年飛往拉斯維加斯賭錢均滿載而歸，阿倫即沾沾自喜說：「我係去攞錢，唔係賭錢呀。」克勤又說每年都收到阿倫的大利是，最難忘一次是：「阿倫係用個篋裝利是。」

克勤一臉饞相，在盆菜中尋寶。	黃伊汶不介意媽咪物色男伴。	克勤祝大家黃金滿屋。

Emme望媽咪第二春

問到眾人的新年願望？阿倫搞爛gag就話：「『四大唱片公司』泊到個好碼頭，好似玩牌九咁，仲有向大人說不。」見眾人聽到一頭霧水，他補充：「講笑咋，我願望係腳傷快啲好，冇踢波成半年，依家啲波癮由腳頂到上頭，再由耳漏出嚟。」

Emme新年會全天候陪家人，問她可期望行桃花運？她反望至錫的媽咪可覓第二春：「媽咪幾個仔女都大晒，我都想佢拍拖，有個伴，我唔會呷醋。」

採訪：音樂組