娛樂圈最近喜事重重，繼李心潔和彭順拉埋天窗後，已育有兩名愛女的Christy，前日清晨六時前，於北京和睦家醫院順利誕下女兒，重七磅三安士，英文名為Cayla。

為丈夫驕傲

已第三次生女的Christy難掩新生命來臨的喜悅，她指Cayla出世時間遲了數天：「原本係二月二日，但遲咗幾日，我都好心急。之前喺香港請咗個陪月員上去，等咗成個星期都未生得，我已經食辣嘢同菠蘿，仲試埋穴位按摩。到嗰日清晨四點幾，我感覺到BB要出世，就即刻叫醒老公，仲講暗號『Titanic』，佢好快手執齊啲嘢，用咗十五分鐘就去到醫院。」

Christy表示到醫院後，由於醫生仍未在場，但BB女趕住出世，結果要Jon出手教路接生。她說：「當時我一路痛一路等，醫生又未到，我老公Professional（專業），佢指揮護士同助產士接生，又叫佢哋放鬆啲，同時又拖住我隻手，又幫手影相同抹嘢，身兼幾職，佢更加似醫生，我好proud of（驕傲）佢。」

鍾麗緹經常與嚴錚帶女兒四圍遊玩，樂也融融。（資料圖片）

鬼妹仔性格的鍾麗緹，懷孕期間經常挺着大肚拍照留念。（資料圖片）

收爐拒再生

問到BB女似邊個？Christy說：「似我多啲。（中文名呢？）未改，英文名叫Cayla。之前睇通勝，話六日係好日子，BB好聽話，依家三個囡囡圍住爸爸，好開心。」她又笑言「收夠籌」，不會再生B：「唔生第四個，三個女都幾好，唔介意係仔定女，最緊要佢哋健康。我哋依家好幸福，而且又到新年，到時三個囡囡逗多啲利是。」

文：專案組