巨肺鄧紫棋（G.E.M.）與怕醜仔狄易達的緋聞鬧得熱烘烘之際，昨日她卻自爆與圈中男士處於互相了解的階段，但為保護這段剛萌芽的戀情，死口不透露對方是何方神聖，只謂：「佢係男仔，大過我囉！」
十八歲的巨肺G.E.M.樣子甜美可愛、身材驕人及唱功了得，先後與陳柏宇、西班牙男模及陳偉霆傳緋聞，前日在網上理想情人選舉中奪得亞軍升呢成「少男殺手」。上月，有傳她與同期出道的狄易達火速撻着，兩人不避嫌打情罵俏。正當外界以為「棋易戀」愛得甜蜜，昨日G.E.M.到電台宣傳時，自爆獲圈中人追求！
過浪漫情人節
G.E.M.以長直髮造型現身：「我剪短咗頭髮呀！（新髮型迎接新戀情？）唔新啦，狄易達已經都講咗兩個禮拜。」她笑指達仔根本有意追求，只是擔心被拒愛感尷尬才極力否認：「佢驚𤓓之嘛，不過都想過個浪漫嘅情人節，最好喺大街大巷做啲浪漫嘅嘢。」
男友年長九歲
問榮升理想情人三甲的她，是否有眾多追求者？G.E.M.謂：「唔係好多，一隻手數得晒，不過都有圈中人。（邊個？）總之係男仔，大過我囉，大我三至九年啦！（唱歌定拍戲？）冇留意佢做乜喎，係幕前。（認識咗幾耐？）未做歌手喺屋企睇電視嗰陣已經識。」她坦言對對方有好感，現時處於了解階段，記者要求她再透露多點時，G.E.M.竟直言：「原本有啲機會都冇埋，總之喺活動見過啦！等我搞掂咗先啦！」為保護嫩苗的她，愈講愈亂不時傻笑，最後不禁補鑊謂：「其實唔係㗎，全部都係我幻想㗎咋！」
此外，狄易達昨日出席公開活動時遇上熱情男歌迷，他坦言有點尷尬：「我鍾意女歌迷多啲。（情人節約G.E.M.？）冇約，自己圈中冇乜女仔朋友，唔敢成日講驚嚇走埋佢。」
文、攝：音樂組