曾自認是「宅女」的鄧萃雯，自從獲黃偉文（Wyman）陪買視后戰衣後，透過對方廣結不少圈中紅人。日前雯女就跟Wyman及陳奕迅（Eason）等食消夜，她更全程黐實Eason雞啄唔斷，完全忘記好友Wyman的存在！
去年雯女憑《巾幗梟雄》四奶奶一角封「視后」，更請得「潮流達人」Wyman替她挑選戰衣。年屆43歲仍是單身的她，近期頻頻黐住相識滿天下的Wyman，日前就透過Wyman相約新一代歌神Eason食消夜，同場還有梅艷芳生前經理人王敏慧（Marianne）等。
挽過萬蚊手袋
當晚眾人逗留至凌晨2時半才埋單走人，店員見兩位紅人駕臨，離開時亦識做地開門送客。戴上帽子的Wyman與Marianne等人先行步出，而挽着價值萬多元的YSL手袋的雯女，就刻意殿後跟Eason並肩而行。
餐廳門外密斟
雖然二人當晚已傾談了兩個多小時，但雯女似乎未夠喉，捉實Eason雞啄唔斷，而Eason亦顯得相當受落，笑到見牙唔見眼。不過，雯女掛住同Eason密斟，竟忽略了「中間人」Wyman，由得他先行離去，自己就站在餐廳門外跟Eason傾談，最後Eason更依依不捨跟雯女揮手道別，看來二人感情又增進一大步。
文、攝：追蹤組