法拉和Marie分別與Neway太子薛世恒和二太子薛嘉麟拍拖，外界一直傳兩女不和。日前法拉多番被指與男友秘密註冊結婚，但法拉對婚訊採取不作回應態度，並揚言農曆新年不會到奶奶家拜年及送禮，看來婆媳關係並不良好。相反，深得未來奶奶歡心的準二少奶Marie，前晚應邀出席「又一城‧華燈盛彩迎新歲」活動時，就繼續行奶奶政策，大玩隔空討好，自稱有家教要拜年。
對於法拉與薛世恒的婚訊，Marie起初不欲多言：「都係問番佢哋好啲！」其後被再三追問法拉是否已秘密註冊時，Marie默認此事：「無論點都好，祝佢幸福快樂！呢件係開心事，總之要尊重老人家！」問到會否送禮給法拉或請對方吃飯？Marie說：「冇呀，都係問佢好啲，見到咪OK囉，冇乜嘢嘅。」她又澄清沒有與法拉不和，強調關係OK：「見到一定會講嘢！」
親自下廚冧男友
早已「入屋」的Marie，與薛嘉麟感情要好。問到何時結婚？她說：「未有咁快！」並指男友未有催婚，現階段以工作為先。她又透露情人節會預留時間給家人，及出埠參加親友的婚禮。Marie亦不忘隔空討好未來奶奶：「返嚟會拜年，呢啲係家教！」似暗寸法拉揚言不跟奶奶拜年。
要出埠過年的Marie無意計劃預祝情人節和買禮物給男方，問到會否替男友買貼身用品？她說：「我諗佢太多，唔使喇。」雖然Marie好像對男友愛理不理，但她自爆前晚罕有親自下廚，自製甜品冧男友。
法拉：唔需要交代
日前法拉被傳已婚時，當事人已表示希望有點私人空間，不作回應，認真耐人尋味！對於Marie昨日爆料，正忙拍劇的法拉被問到有否不開心？她說：「我都係人，我都有感受，特別係畀人指摘畀人講！但相信佢係善意冇惡意，總之我會努力，靠自己演技被人認同，唔係靠緋聞。」對於Marie表明去薛家拜年，暗示法拉因工作不去是沒禮貌，法拉說：「我雖然過年要工作，但我係傳統嘅人，會尊重長輩，就算見唔到都會電話問候。而且同邊啲長輩、朋友拜年，都唔需要公開交代。」
文：名人組