楊千嬅與丁子高婚後雖然很少一起出席公開場合，但跟記者做訪問時話題都離不開另一半，經常隔空傳情大晒恩愛！前晚，千嬅出席完《十大中文金曲頒獎禮》後接受訪問，對於早前被拍到兩人「蜜遊」時大發「公主病」，千嬅表示：「公主？幾十歲人仲叫公主？咁畀面呀？寫我係山寨王咆哮仲好啦，（兩公婆攬到實喎？）佢梗係攬住我啦，唔通攬第二個咩！（會唔會避免喺公眾場合攬錫？）行得分開少少就話婚姻有問題，依家咁寫已經好好喇。」

為走音解畫

丁子高昨日與港姐劉倩婷、李姿敏、謝婷婷、謝雪心等出席慈善步行活動，揚言睇電視見太太攞獎感高興，但因千嬅一早要返大陸工作，所以未有慶祝活動，他晒恩愛表示：「就算得唔到獎都係次要，我心中佢已經攞獎。」

提到千嬅被指唱歌走音，丁子高解畫：「好慘呀，近幾年佢受哮喘困擾，雖然成日練歌，但一冬天氣管就收縮，之前佢出席無綫頒獎禮係咁噴藥，佢唔係走音，係唔夠氣，我都有煲鱷魚肉湯畀佢飲，不過冇乜效。（有報道指千嬅喺日本旅遊時公主病發？）完全唔覺得，就算有都係我搞到佢咁。（又關你事？）佢係我公主嚟嘛！嗰日佢冇扭眼瞓，我成日整蠱佢，一見佢呆滯就會摵佢。」

丁子高心甘情願讓千嬅公主病發。

丁子高與婷婷等出席慈善步行。

情人節有禮

他又表示新年二人不會外遊：「年初一雖然係情人節，不過屋企會好多親友嚟拜年。（會預幾多錢派利是？）六位數，雖然情人節唔可以過二人世界，但我已經預備咗一份好有心思嘅禮物畀太太。」

另外，早前楊千嬅於數名工作人員陪同下，坐車到置地文華酒店，當記者上前拍照，身旁的工作人員向記者表示約了做專訪，千嬅亦收起笑面，一行人走進附近一大廈。

文：影視組