「第三十二屆十大中文金曲頒獎禮」前晚圓滿結束，眾歌手於後台大合照時Eason與謝安琪（Kay）不避嫌並排而企，有講有笑，身穿BV桃紅飄逸長裙的祖兒跟蔡卓妍（阿Sa）的戰衣撞色，兩位好姊妹同樣搶鏡。

瘋狂血拼碌爆卡

祖兒以大熱姿態終極稱霸「四台聯頒傳媒大獎」，完騷後她到後台跟fans開香檳慶祝，氣氛非常熱鬧，她說：「隔好幾年再得到呢個獎，感覺好似同個好耐冇見好朋友久別重逢咁，撞正今年入行十周年，像畫上個圓滿句號去開始新一年咁，我最希望樂壇風雨真係完結，唔想再耗損呢個地方。」為了慶祝攞獎，祖兒往瘋狂Shopping更碌爆卡作為自我獎勵。早前她笑言要踩扁對手Eason，祖兒解釋只是劇情需要，為頒獎禮製造緊張氣氛，心底很希望與Eason一齊攞獎。

事實上他倆認識多年老友鬼鬼，兩人在後台分別受訪時不忘隔空互窒，失落「傳媒大獎」的Eason說：「我冇失望，不過覺得個氣氛麻麻哋，我攞過咁多年『傳媒大獎』，記得往年個氣氛好勁呀嘛，佢總共攞幾多個獎？（19個。）哦，我其中一年都攞過21個啦！（你嘅成績好勁噃！）使乜講，年輕人，下年再努力啲啦！」說時更刻意轉身面向祖兒。

祖兒答謝fans的愛戴，開心「吹喇叭」。	Eason與Kay並排而企，有講有笑。	謝安琪少有地谷胸亮相。

隔空玩「謝無綫」

由於港台以「廣管條例」嚇窒無綫前晚「焗住」足本播出節目，Eason說：「受惠嘅係觀眾，我相信可以幫到電視台收視，相信收視應該會幾好，多謝TVB。（做乜多謝？）今年冇機會講吖嘛，多謝港台同TVB。（接受亞視訪問？）總之以後用國語問就用國語答，用廣東話問就廣東話答。」提到有傳他本月將亮相亞視，Eason表示不知道合約到期日，可會擔心得罪無綫？他說：「我擔心油錢多啲，亞視喺大埔好遠嘛！」此外，Kay昨午啟程到孟加拉作慈善探訪，此行她帶備蠟筆及餅乾送贈當地兒童，其夫張繼聰特別叮囑她自備飲用水，以免水土不服。

文：音樂組