樣子甜美的樂瞳理應不乏追求者，但是小妮子決定暫時將感情事擱下，除了為努力發展星途，亦因為她需要過渡期：「大半年前同男朋友分咗手，感情冇咗係要一段時間先可以平復，不過已經比之前好咗好多啦！」

唱到想喊

早前她推出的EP《短罪》正是樂瞳的故事，直言每次唱到Music Break都想喊的她謂：「首歌講個女仔係第三者，男朋友每次只可以陪佢好短時間，明知對方有另一個女友，但又唔捨得放手。我之前都試過個男朋友幾日先搵我一次，每次十二點一定要走，嗰時成日喊好唔開心，初時都唔知佢有女友，佢仲帶我返屋企同佢屋企人食飯，好似好確定你嘅地位咁。」後來樂瞳發現真相，於是狠心斬纜。

失戀喊是好正常，不過，樂瞳錄音時亦曾流淚，她說：「試過畀鄧智偉（監製）鬧到喊，其實佢好照顧我，有次錄音佢想我以第三者嘅角度唱個故事出嚟，我見到佢個樣好唔滿意，即刻好驚，心諗係咪我做得唔好、係咪我好差？」自小喜歡日本型格天后濱崎步的樂瞳，並以對方為目標：「佢個形象好似公仔，我都想似佢，不過又想百變啲。（玩性感？）我身材麻麻，只可以適當地性感，不過如果成日都性感就會睇厭架啦！」

文、攝：音樂組

場地：Privacy