人氣樂隊Mr.即將推出最新大碟《Mr. Like Black》，並邀請潮人教父葛民輝設計結他pick，阿葛為支持後輩分文不收，還笑言差點要倒貼，難怪Mr.揚言要無條件報答阿葛！
80後的Mr.一直視葛民輝為偶像，難得請到阿葛「出山」幫手設計隨碟附送的限量版結他pick，五子表現雀躍，Dash還帶備私人珍藏——多年前阿葛與品牌合作出品的波鞋及figure公仔見偶像。
行快人好多步
Dash說：「呢個珍藏品無論炒到幾貴我都唔捨得賣。以前堂家姐好鍾意軟硬，我成日幫佢剪報，大個之後開始留意佢哋嘅音樂，佢80年代已經開始rap，阿葛真係『鬼才』，乜都行快人好多步。」
阿葛看到一班年輕人對音樂的熱誠亦被打動，問到酬勞多少？他哈哈大笑說：「冇收錢㗎，大家都知Duncan（環球高層黃劍濤）幾孤寒……，講真我覺得今次幾好玩，佢哋又唔係要嚟賣錢，只係隨碟附送畀fans，令到成件事更加完美，咁有心，都好應該支持吓樂壇。」
希望學吓rap歌
前輩免費出手相助，Mr.無言感激，還承諾將來無論阿葛有甚麼要求都會答應，主音Alan就說：「我哋會請佢食飯同睇演唱會，如果佢肯嚟做埋演唱會嘉賓就更加好。（想唔想合唱？）梗係想，我覺得rap好難，讀字又跟唔足拍子，希望可以跟佢學嘢。」
文：專案組