音樂人周永恒（Roy）跟拍拖六年多的趙梓淇（前名：趙頌茹，阿Yu）昨日拉埋天窗，成為2010年娛樂圈首椿喜事，一對新人在婚禮上多次感動落淚，Roy坦言因宗教關係，婚前禁慾兩個月，令他非常期待晚上的洞房花燭夜。
昨晨一對新人在律師樓辦完註冊手續後，下午三時許Roy跟阿Yu在葵芳基督教復興教會舉行婚禮，雙方父母及圈中好友包括高皓正、關心妍、梁雨恩、張致恒等出席觀禮。
新娘子阿Yu穿上BCBG白色長裙、足踏Zara藍色高踭鞋，一身簡約打扮，清麗可人，她在爸爸帶領下進場，Roy就穿上西裝自彈自唱一曲《Wonderful Tonight》冧老婆，婚禮期間，一對新人多次感觸落淚，場面感人。
期待破戒
Roy坦言去年獲高皓正提醒，一直跟阿Yu同居兼有婚前性行為的他決定暫停「行房」，雙方為免犯下「十誡」而決定結婚，問到死忍兩個月會否非常期待洞房夜？Roy說：「我期待呀，我都係血氣方剛嘅男仔，好正常，呢兩個月對我同阿Yu都好有意義，感覺好似去番初戀咁樣。（造人？）隨時Ready，希望三年抱一，因為我好鍾意小朋友。」
海邊婚宴
他倆透露婚宴定於4月2日舉行，暫時場地未定，但將選址海邊或沙灘，問Roy何以未見叔叔周啟生蹤影？Roy解釋說：「佢去咗旅行嚟唔到，話返香港再請我哋食飯慶祝。（關係已經和好？）我信主之後，好想修補關係，喊住咁打畀佢認錯，下月中我會幫佢做個騷，算係認錯之後大家首次合作。」
有此一著
阿Yu身形又高又瘦，簡簡單單着起一條白色長裙禮服，造型有些少似希臘女神裝，高貴大方之餘亦凸顯她的model身形，由於布料同設計都屬於春夏的輕鬆感覺，阿Yu配上一對露趾鞋，比起普通高踭鞋來得自然。
文：音樂組