容祖兒、古巨基及蔡卓妍（阿Sa）昨日接受網上電台訪問，分享入行十年奮鬥史。剛由上海返港的祖兒甫見記者即大吐苦水：「今朝喺上海返嚟，因為太早起身，喺車上瞓着咗，突然意識到有人影緊我！朦朧間我見個司機一邊揸軚盤、一邊揸住手機，咪即刻喺倒後鏡望實佢囉！佢個眼神好閃縮同鬼祟，當時只得我、化妝師同髮型師。」

（左起）基仔、祖兒和阿Sa在活動上笑得開懷，未被事件影響心情。

阿Sa出席活動時以過膝長靴配短裙騷美腿。

拒簽名作小懲戒

深深不忿的祖兒一直等待助手救援，她續說：「因為佢坐喺第二架車，點知去到機場，司機仲叫我幫佢簽名，我咪叫佢交部電話畀我睇，佢點知我係電腦小神童吖，真係攞畀我睇。（跟住點？）我極速搵到偷拍嗰條片，仲即刻刪除咗，仲同佢講唔幫佢簽名嚟懲罰佢。」祖兒坦言今次事件令她擔心安危：「原來呢個世界好唔安全，好似赤裸咁。（聰明？）唔係，係醒同機警。」

此外，有傳Amusic在《勁歌》頒獎禮未能為衞蘭的歌曲《就算世界沒童話》爭取「金曲金獎」，故暫不接受無綫及有線訪問作「無聲抗議」。憑歌曲《搜神記》勇奪「金曲金獎」的祖兒喪笑謂：「咁誇？冇睇報道唔識答，都有聽過《就算世界沒童話》。（邊首好聽？）梗係自己嗰首啦！」

阿Sa籲樂壇團結

阿Sa與古巨基則力撐祖兒的《搜神記》奪「金曲金獎」是實至名歸，阿Sa說：「冇話邊首hit啲，每個電台同電視台都有佢嘅機制。（Amusic作無聲抗議？）相信香港歌手都想香港樂壇團結，其他地方都好犀利，所以我哋要更加團結對抗。」基仔亦稱：「兩首都有聽，祖兒首《搜神記》好好聽，唔了解唔想發表意見。」

採訪：音樂組

有此一著

祖兒穿上連身黑色短裙，外披Miu Miu透視金色褸，配襯購自On Pedder的黑色長Boots出席活動，盡騷其潮流Icon品味，她自爆扮靚心得全靠看潮流書籍，雖然貴為天后的她已吸引不少大型品牌贊助服裝，但她每季仍需花六位數掃貨。