凌晨一時許，Yumi和好姊妹Melody現身蘭桂坊，平日打扮性感的兩女着得十分密實，見到記者非常合作，企定定任影唔嬲。問Yumi為何不與男友同行？她笑言是趁男友睡覺後才出來，和Melody一齊出席同公司歌手Chelffy Yau舉行的派對。

怕被誤會識男仔

Yumi說：「男朋友都知我會出嚟，我今晚成晚都會黐住Melody，費事有男仔經過我身邊，會畀人誤會我識男仔。」Yumi自爆已見過男友父母，感覺不錯。問到男友家人有否催婚？她甜笑謂：「唔會啦！不過如果係時候都會結，但未有結婚計劃，依家最緊要係努力工作。」自言仍是單身的Melody，雖然有追求者，但她堅持寧缺勿濫，故自嘲情人節要呆在家中。

至於鈴木仁和女友區文詩（Angela）於十一時許現身Dragon-i。鈴木仁表示預先與本月廿五日生日的女友慶生，又稱剛由日本返港，故情人節可與Angela在港度過。問到會否在女友生日求婚？鈴木仁哈哈笑說：「唔會，未計劃結婚。」

Yumi與男友感情穩定，已見過對方父母。（資料圖片）

前晚鈴木仁預先與女友Angela慶祝生日，但禮物就要留待正日才送。

Jessica避鏡頭

另外，男友Sergio不在港的Jessica C.，凌晨一時四十分與幾位外籍友人現身蘭桂坊。Jessica C. 為掩人耳目，不但穿皮褸「封胸」，並戴cap帽急步進入VOLAR。當發現記者時，她即拉低帽子兼低頭，進入夜店時更刻意掩面，同行朋友也埋身掩護。

文：名人組