由安仔、關詠荷主演的無綫劇《五味人生》，劇名寓意人生之中有高低起跌不同階段，就如甜酸苦辣鹹五種不同味道，而在電視圈打滾廿年的安仔，經歷過不同「味道」，最終苦盡甘來，現階段感覺甜到漏。

安仔行生果檔，樣樣都想試。	拍完《五味人生》，對食都有研究。	安仔事業有成，有賢妻及乖仔，現階段甜到漏。

冇錢交租

安仔透露入行初時，飽嘗酸、苦、辣三種「味道」，他說：「『酸』係因為初入行時，好多同期嘅藝人都先後跑出，好似黎明、郭富城，我哋係同時段出道，跟住佢哋好快就紅咗，嗰時我感覺係酸溜溜。『苦』就係做咗一段時間藝人，但係冇回報、冇錢、冇知名度，記得九○至九五年，試過窮到擔心冇錢交租，收入好唔穩定，嗰段時間係我人生中最苦。而『辣』係拍啲動作戲，當年唔興動畫，所以好多動作都要自己做，好似喺山崖倒吊，真係好難捱，感覺好『辣』。」

全靠阿旺

經歷咗這段又「酸」又「苦」又「辣」的階段後，安仔終於守得雲開，年前更憑「阿旺」角色一炮而紅奠定一哥地位，再加上婚後升級做爸爸，令安仔甜到漏，他說：「依家係人生中最『甜』，一來阿旺帶挈收入多咗，二來係結婚、兒子出世後，睇住佢長大，同佢一齊唱遊，感覺好甜，希望兩年後生多個女，一家四口咁就更圓滿，甜上加甜。」

文：影視組

攝：秦健輝