楊思琦一向愛戀舊物，最近政府通過撥款起高鐵，令菜園村居民痛失家園。思琦認為雙方有斟酌餘地，贊成「80後」以和平方式抗議，保留香港買少見少的菜園地區。
師範出身的楊思琦一直有留意社會時事，最近政府成功獲批669億元興建高鐵，思琦直言選址有商榷餘地，她解釋：「其實都贊成起高鐵，可以幫助經濟發展，但菜園村係咪唯一選擇呢？我諗政府應該多聽取民意，事實上香港已經好少搵到環境咁寧靜嘅菜園地區，有時呢啲係感情投放，唔係求其畀筆錢就要人哋搬走。」
行絲路賞古蹟
思琦認為每件舊物都有值得懷念的地方，尤其是歷史古蹟，更應該趁年輕時到處旅遊開眼界，她最自豪曾到過烏魯木齊體驗當地生活，她說：「讀書時約埋成班同學仔一齊去行絲綢之路，一次過睇晒長城、兵馬俑、故宮、敦煌，玩咗足足個幾月，仲要去埋烏魯木齊。不過，嗰時嘅烏魯木齊衞生環境真係好差，周圍都有糞便，戴住口罩再噴半支香水先辟到味，講真依家叫我再去都幾難，但細個捱得，亦係人生一次好難得嘅體驗。」
當林保怡嘉賓
而思琦早前更為林保怡主持的文化節目擔任嘉賓，她大讚布景場地夠真實，她笑說：「佢哋放咗三個大銀幕喺廠，連地上都係用一塊白色反光板，企喺中間欣賞敦煌嘅壯麗景色，十足去咗睇3D電影一樣咁正。」
文：專案組
攝：馬永堅
髮型：Chris Cheng @ IL COLPO
服裝及場地：Arrogant Cat