踏入虎年，娛樂圈第一樁喜事就是42歲的陳小春做「老襯」，出名孝順的小春對於無法讓媽媽有生之年飲到新抱茶，感到非常內疚。
眾所周知，小春非常孝順，小時候眼見母親在酒樓做洗碗很辛苦，年僅十歲已很懂事，每天放學飛奔到酒樓代母工作，惜其母於05年不幸逝世，身為長子的小春未能在母親有生之年成家立室，一直引以為憾。
母曾見過女友
日前陳媽媽死忌，小春親自回鄉拜祭，並親口向亡母「報告」婚訊，他說：「我細個屋企好窮，爸爸唔黐家，媽媽唔識字，我習慣了養家、照顧弟妹，一直很想成家，但緣分未到，緣分到時媽媽已經走咗，但以前女友嚟過我屋企BBQ，媽媽都見過佢。」
目前小春還未計劃妥當兄弟團名單：「我知道姊妹團陣容，個個都劈酒好勁，所以我要搵番啲勁人做戥穿石。當然一齊組『風火海』嘅謝天華和太太到美國睇我註冊，但朱永棠就嚟唔到，佢都結咗婚又生咗兩個BB，我喺香港擺酒佢就會到。（伊健呢？）佢梗要到！」
夫妻檔好唔型
小春預計會在港擺五十圍，但朋友太多，他笑言：「擺多一百圍都怕有遺漏。」情人節在美國註冊後，小春火速登台搵錢養家，但他抗拒夫妻檔賺錢：「我好抗拒情侶檔、夫妻檔表演，公然肉麻又Hardsell，最緊要係唔型嘛，所以過往我都係推嘅。」
文：李慧盈
攝影：沈健程 化妝：Vincci Wu 髮型：Cliff Lam